عزرائیلی کیم اؤلدوره جک؟

یازار : هاماش

+0 به یه ن


دوکتور جئری یازیر کی اؤلوم ملاکه سی چیراغ گئچیردن عزرائیل سؤیله میش کی ایراندا تورک لراؤزدوغما آنا دیل لرین اؤخویاجاقلار آنجاق من گؤرمیه جاغام. بونو دئرکنده گویا دویقولانیب آغلاییب سئل کیمی گؤز یاشی آخیدیبدیر. بو ایروایته اینانماییب ایسته دیم کی عزرائیلدن بو اولایین دوز اولوب اولماماغین سوروشوب بیلیم. ترس آوا تنگه سینده ویرنیخیب دولاشارکن ائشیتدیم کی دیل باغلاییب طیلیسیمه سالان جادی جنبل باشچی سی غولامعلی جان اوسته دیر. عزرائیلین اوردا اولماسین کسین بیلیب دابانا قووات غولامعلی نین ائوینه قاچدیم. تووشیه تووشیه تر توکرکن ائوین قاپیسیندان ایچریه گیریب اوردا اولان غولامعلی نین قوهوم اقرباسینه سالام وئریب غولامعلی یاتان اتاغین قاپیسینا باخاندا گؤردوم عزرائیل قوللارین چیرمالییب الینده اؤلوم ایپی ایستیر اتاغین قاپیسین آچسین. دالیدان الیمی چینینه قویوب سالام کئف احوال ائدندن سونرا دئدیم:

باغیشلا عزرائیل جان! ایشیوا مانع اولورام آنجاق دئییشلره گوره سن ....

سؤزومو کسیب دئدی: قوی بو کیشی نین ایشین تاماملاییم اجل واقتی گئچر غولامعلی نینده شیخ جین آتی کیمین اؤلوم گؤپنی یاناریئردن قالخار بیرده اوستن امر آلاناجان باشیزا قالمایان اؤیونو گتیرر.

بو سؤزو ائشیدنده دالی دالی چکیلیب دئدیم:

یوخ آماندی تئز ایشیوی گؤر قویما بو کافدار یئردن قالخا.

عزرائیل اتاغا گئچنده منده فیکر دوشونجه ایچینده الیمی اوغوشدیرا اوغوشدیرا قاپیدا او باشا بو باشا گئدیردیم. عزرائیلین اتاغا گیریب چیخماسی تاخیرا دوشونجه ناگیران اولوب قاپینی آرالییب ایچری باخاندا عقیله گلمز بیر اولای  گؤردوم عزرائیل ایپی غولامعلی نین بوینونا سالیب آنجا غولامعلی ده اؤنجه دن حاضیرلادیغی بیر کندیری عزرائیلین بوینونا دولاندیریب بیر بیرلرین بوغماغا چالیشیرلار. بو آرادا عزرائیلین دورومو آغیر گؤرونوردی و نفس آلماقدا زورلوق چکیردی. رنگی قاپ قارا اؤلموشدی و دیلیده ائشیگه چیخمیشدی. اؤز اؤزیمه دئدیم:

عزرائیل اؤلسه بیز اینسانلار اؤلمه یه جاغیق، قوی بو اؤلوم ملاکه سی اؤلسون قوتارسین.

سورا دئدیم: عزرائیل اؤلسه غولامعلی دیری قالاجاق. عزرائیل بیر دؤنه جان آلسا بو سیستیمسیز مین دؤنه اؤلدورور.

زامان یوخ ایدی هر آن اولاسی دیرغولامعلی نین قورقوهوملاری گله، قارار وئردیم عزرائیله یاردیم گؤسترم. نده اولسا اوجا تانرینین امریندن باشقا بیر ایش گؤرمیر آنجاق غولامعلی نین ایشلری تانری وئرن دیلی باغلاماقدان توتدی تا تانری وئرن چؤرگی کسمکدیر. یا آلله دئییب یاپیشدیم ایپین اوجوندان. عزرائیل او باشدان من بو باشدان ایپی چکدیک تا ایش تاماملاندیر.

 اؤلومدن دؤنن عزرائیل بوینومو قوجاقلاییب اوز گؤزومدن اؤپوب دئدی: سن منی اؤلومدن قوتاردین! ایندی دئه گؤروم سنه نه ایش گؤره بیلرم؟

دئدیم: والله گلمیشدیم  دئیم الینده کی ایپی سال پیس آداملارین باشینا قوی بیزده گونه چیخاق سنده! آلله بول بول توکدی باشیمیزا بولار الیمیزدن آلدیلار. دیل وئردی دانیشاق حاققیمیزی ایسته یه ک، بولار باغلادیلار. آنجاق سن منی لاپ قت اومود ائله دین.

دئدی نیه؟

دئدیم: کیشی سنین بیر چوروک غولامعلی یه گوجون چاتمیردی. من اولماسایدیم ایندی اونون یئرینده سن اوزانمیشدین!

اؤرکلنیب آغلایا آغلایا دئدی: دوزون بیلمگ ایسته سن ایندییه کیمی بیر بئله اینسان جانی آلمیشام. بئله چاراسیز قالمامیشدیم. قورخورام شیطان کیمی آللهین امریندن چیخام جنتدن سالا ائشیگه، یوخسا بو طایفانی اؤلدورمگه گئتمرم. بئله گئتسه منیمده اؤلوموم بولارین الینن اولاجاق.

 





یوخسولون قیسمتی کؤتکدی

یازار : هاماش

+0 به یه ن
اوجورکی بیلیرسیزو دوکتور جئری قزئتینده یازیب، منیم داییم، قالایچی مورتوض، تزه لیکده آخیرت سفریندن دونوب و ایلک آدام اولاراق نکیری مونکری زیارت ائله ییب و اولاردان بیر ائششک حئسابین وئرمک ایچون دویونجا کؤتک یئیه ندن سورا دارماداغین بو دونیایا قاییدیب. داییم اولدوغونا گورا منیمده بوینومدا بیر آغیر یوک وار. هر نه جور اولسا جان جیار ساییلیریق.  گئدیب اونو یوخلاماق منیم بورجومدیر. دونن بیرآز یئر یئیینتی آلیب قالایچی دایینین ائوینه دوغرو یولا دوشدوم. یئتیشدیم الیمی باسدیم قاپینین زیلینه، های وئرن اولمادی، قاپینی بیر آز تاپدالایاندان سونرا، قالایچی دایینین حیات یولداشی قاپینین دالیسیندا های باسدی :آماندی قاپینی سیندیرما گلدیم. یازیق دایی دوستوم دئیینه دئیینه قاپینی آچیب اییلمیش بئلین دوزه لدیب باشین قوزاییب اؤزیمه باخاندا، سالام دئدیم کئفین سوروشاندا قهرلنیب آغلیا آغلیا دئدی : آی بالا!آللاه اینسانین عقلین آلینجان جانین آلسین بیر یوللوق قورتارسین! سنین بو یوخسول داییوین آروادی اولاندان گون اؤزینه حسرت قالدیم. اؤره کدن بیر آه چکیب علاوه ائله دی : اوجا بویوم بو قاپیدا بوکولدی،گؤزه للیگیم، ساات بدنیم الیمدن گئتدی، ایندی ده قوجا واختیندا دوشوب یورقان دوشه گه، آلتین اوستون تمیزله مک منه قالیب. اوخ  اوخ! قیچیم سیناردی بو ائوه گلین گلنده. اؤزگه اوغلونون یولوندا اؤزیمی چوروتدیم. دونوب ائوه ساری گئدنده، منده دالیسیجا یاواش یاواش آددیملایا آددیملایا دایی دوستونون غمین کدرین یونگوللتمک آماجیلا  دئدیم :دایی دوستی! اوستاد شهریار رحمتلیک دئییر: آخیرتی اولانلارین دونیاسی غم سیز اولماییب. سنین بو زحمتلرین هئچه گئتمز. بو دونیان اولماسادا او دونیادا یئرین بهشتین لاپ اورتاسیندا اولاجاق. اؤزیده آللاه  سنی بهشتین ان گؤزل حوری سی ائلراینشاللا. ائله قالایچی دایینیندا بو دونیادا نه چیله لر چکدیگین بیر آللاه بیلیر. اودا قلمان اولار، بو دونیانین یئرینه او دونیادا آی یاشارسیز هااا. دایی دوستوم بو سؤزلری ائشیدنده آیاق ساخلاییب اللرین بئلینه قویوب دونوب اؤزیمه ایری ایری باخاندا دئدی: بالا هاماش! من ائشیتمیشم کاسیبین نه بو دونیاسی وار نه او دونیاسی. نه حوری سی؟ نه قلمانی؟ گینه منی دئسن یاراشاندی قالایچی موتوضدان قلمان اولار؟ هله او دونیانین قاپیسیندان باخیب،سنده باغیشلا اوراسینا کاسوو سالیب گؤندریبلر باشیما. باشین توولاییب آیاغیندا کی ترلیک لری قاپینین آغزیندا چیخاردیب ایچری یه گئچنده منده اونون تفلیک ائتمه سیله آیاق قابی لاریمی چیغاردیب  ایچه ریه گئچنده قالایچی داییمین سیزیلتیسن اتاغیندان ائشیدنده اوتاغا گئچیب داییمین دارما داغین اولموش دورموون یورقان دوشک ایچینده گؤرنده اؤزومو توتا بیلمه ییب اؤره کله نیب آغلادیم. قالایچی داییدا سیزیلدایا سیزیلدایا بارماغینین اوجینن منی اؤز یانینا چاغیردی. گئدیب یانیندا اوتوروب الین الیمه آلیب نه تهر سن؟ دئینده، چوخ قورخموش آداملار کیمی گؤزلرین بره لدیب قاشین یوخ نیشانه سیله اوسته ترپه دنده، حالینین یامان اولدوغون منه گؤستردی. آخی بیلیرسیز! کیشینین قورخوسوندان دیلی توتولوپ و هئچ اولماسا دانیشیب اؤره گینده بوشالدا بیلمیر. هر حالدا بیر آزحال احوال سوروشاندان سورا قالایچی دایی قاش گؤزنن جاوابلادی، سورا گؤردیم بارماغینان گؤبکدن آشاغینی گؤستریر باشا دوشمه یینجه، دایی دوستومو چاغیریب دورومو بیلیندیرینده گؤردوم دایی دوستومون قاش قاباغی ساللاندی اؤز اؤزینه دئیینیب یامان یووزدئماغا باشلاییب آخسییا آخسییا گئدیب بیر له ین نن آفتافا گتیرنده ایشی آنلادیم. اؤز اؤزیمه دئدیم داییم اوتانار دوردوم یولا دوشم، دایی دوستوم دئدی :من اوتوروب دورا بیلمیرم، قولوم قیچیم آغرییر،سن جاوانسان، بو گون دایی جانیوین زحمتی سننن اولسون!  دئمه لی من یازیغین قدرینده قالایچی دایینین یانین یوماقدا وارایمیش. داخی بو باره دانیشماغیم گلمیر هئچ سیزده سوروشمایین!بیر تک بونو دئمه لی یم کی داییم یئردن دورونجان دایی دوستوم بو آفتافا له ین ایشین منه تاپشیریب. چونکی دایی دوستوم دئییر: آخیرتی اولانلارین دونیاسی غمسیز اولماییب! دئییر او دونیادا غلمان اولماق ایسته سن، بو دونیادا دایی جانیوین یانین یومالیسان!! بو تجریبه دن سونرا من بیر درین فیکره دوشمیشم. دئییرم ایشه باخ! شیخ جنابلارینین تؤره مه سی یئسینلر پارتدامایینجا دویماسینلار، قالایچی مورتوضدا بیر تیکه چؤرک تاپماق ایچون قبیرده یاتیب باشقاسینین یئرینه نکیری مونکرین جاوابین وئرمک زوروندا قالسین، اولاردا اونوبیر ائششگه یوک چاتیب هردن بیر مینمگ ایچون ویریب یورقان دؤشه گه سالسینلار. خالقین دایی سیندان پولدان مالدان قالاندا، منه ده داییمین یانین یوماق قالسین. ایسته ییرمده دردیمی سؤیله یم شیخ جنابلاری دئییر:قیسمت دن آرتیق یئماق اولماز!!




ایتی کوشکوره ن اولماسا جومماز

یازار : هاماش

+0 به یه ن
ائشیدیبسیز دئیرلر"فلان آدام ایت کیمی قورخاقدیر". آتا بابامیز هئچ سؤزو بوشونا سؤیله مه ییبلر. اصلینده ائله ایت چوخ قورخاق حئیواندی آنجاق آدام اوستونه جومان ایتلر بیر باشقا اینسانلار الینده بسله نن ایتلردیلر. اوستاد شهریارین بیر سؤزی وار بویورورکی: ایتیمیز قورد اولالی، بیزده قاییتدیق قویون اولدوق   ایت ایله قول- بویون اولدوق.  اینسان اوستونه جومان ایت هئچ شوبهه سیز باشقا اینسانلارنان قول بویون اولان ایتلردندی. میثال ایچون بیر دوولتلی نین یازدیغیندا یئییب قودوروب و یا بیر چوبانین یانیندا اتدن کوتدن یئییب هارینلایان بیر کؤپکدی. دئمه لی ایتنن قول بویون اولان اینسانلار او ایتلره اؤره ک وئریرلر. گؤروبسوز اییه سیز ایتلر یول قیراقلاریندا آت آشغال توکولموش یئرلرده سوله نرلر و اینسان گؤرنده یا قاچیب گیزله نرلر و یا قویروقلارین بوللارلار آنجاق اینسان الینده بسله نن ایتلر بیر باشقاسین گؤرنده ییرتماق قصدیله حمله ائده رلر. ایتی کوشکوره ن آدام اولماسا، اینسان اوستونه جومماق جساراتی اوندا اولماز.




عاغل پایلاناندا کیملره یئتیشمه ییب؟

یازار : هاماش

+0 به یه ن

بیچین واختی غیبالی نن گنجالی بیچین بیچنده غیبالی  اوزدن ایراق ائششگینده زمی نین قیراغیندا باغلامیشدی. شیرین شیرین دانیشیقلارین آراسیندا گنجالینین گؤزو غیبالی نین قولاقلاری ساللانمیش ائششگینه ساتاشاندا دئدی: غیبالی! بو ائششگی سات گئتسین، قوجالیب الدن دوشوب. غیبالی قاش قاباغین ساللاییب دونبالدی بوغدالاری اوراقلایا اوراقلایا دئدی : بو حئیوانی ساتمارام بونون گؤزلری رحمتلیک قاغامین گؤزلرینه اوخشاییر.کیشی نین گؤزلری دولدو بیرده سؤیله دی:اونو گؤرنده قاغام یادیما دوشور. اویاندا زمی صاحابی بو سؤزلری ائشیدنده باشین تولاییب بولارا دئدی:گؤره سن  آللاه عاغل پایلایاندا  سیز هاردا ایمیشسیز!!؟ غیبالی اربابین سؤزون جاوابسیز قویماییب گنجالیه دئدی:گنجالی! عاغل پایلانان ایلی بیز هاردا ایدیق؟اودا بیر درین فیکره جوموب سورا دئدی:غیبالی! یوزه یوز بیز او خاراب قالمیش گون چیخماز کندینده اولان ایلی بو عاغل پایلاما ایشی اولوب! اورانین یول یولاغی داش قایا اولدوغونا گورا اورا گلیب چیخان اولماییب.

من بئله بو گونلر چوخ ایسته ییرم بو غیبالی دان گنجالیدان بیرین گؤره م بیر سؤروشام گؤره م گون چیخماز کندینده بولارنان بیرگه او ایل کیملر وار ایمیش؟ منه قالسا من دئییرم او ایل اوردا چوخ آدام وار ایمیش.

هاماش خانکیشیلی





آللاه ائله سین، جاناوار گلسین هامینی یئسین تک آغام قالسین!

یازار : هاماش

+0 به یه ن

نه منه قوروم قونشو وار هامیسیندان دویموشوق. باتی اؤلکه سیندن ده لاپ زهله میز گئدیر. ائله اونا گورادا ایت طایفاسی اروس،دینسیز ایمانسیز ایت قورد یئیه ن چین دویلتی، قوزئی کوره قودوغی نن ال اله وئرمیشیک آللاه دئیه ن اولسا هامینی وئره ک قوردا. ائله کی جاناوار گلدی هامینی یئدی تک آغام قالدی دده وای نه کئف ائله یه جه ییق. بوتون اورتا دوغو بیزه قالاجاق. نویید دن گازدان بولون سولون ساتیب خشله یه جه ییق. مکه کربلا بوتون بیزیم اولاجاق. پول جیبیمیزی جیراجاق. فهدیین قیزیلدان اولان ایاق یولوسونا اجی ائلییه جاغیق. آلله! بو اروسو چینی همیده قوزئی کوره قودوغین بیزه چوخ گورمه. هئچواخت بیر بئله آرزیلاریما یاخینلاشمامیشدیم.گئجه یوخومدا گؤردوم دوبئی یین قباله سین ویردیلار منیم آدیما. یانی سیزین آنلادیقینیز امیر دوبئی  اولدوم. غم غوصصه یئمه یین ها ائله سیزه ده من جان یئتیشه جک. قوتاران دئییل کی بوتون اورتا دوغو بیزیم اولاجاق. سالیق اولسا بو گوج کی بیزده وار اورتا دوغویا یییه دوراندان سورا بوتون دونیانیدا اؤز آرامیزدا بولوشدیره جه ییق.





خان کیشی لی اوتاندی بوزوقلی نین دیلی اوزاندی

یازار : هاماش

+0 به یه ن

بیزیم بو کتده آلماس بئین بیر قه فه سی وار. قدیم زامانلار باشیم آییند اولاندا اورا چوخ گئدردیم. قه فه ده آشیق یحیا ساز چالاردی کالبای طومار گؤزل گؤزل ماهنی لار اوخوردی. منده ائله قدیمنن ده ده بابادان قالما بیر شعر کیتابیم وار، آشیق یحیا چالاردی منده یاخجی شعرلر اوخویوب آلقیش آلاردیم. آنجاق سون زامانلاردا آشیق یحیا و کالبای طوماردا قه فه یه آز گئدیردلر. منیمده ائله باشیم باغدا زمیده و یا مال حئیوانا باخماقنان بند اولدوغونا گورا قه فه یه چوخ واخت اولاردی کی گئتمه میشدیم. دونن ایشلری یئر به یئر ائله یندن سورا باشیم بیر آز آچیلدی کیتابی گؤتوروب قه فه یه ساری یولا دوشدوم. قه فه یه گیریب جاماعاتا سالام وئریب ایلشدیم. آنجاق تعججوبله گؤزدوم قه فه ده اوتورانلار اوجا سسله بوزوقلو دیلی دانیشیرلار. چوخ باخدیم گوروم بلکه باشقا بیر قه فه یه گلمیشم، دئدیم قوجالیقدی دا، آدام بو یاشدا چوخ چاش باش ویرار. گؤردوم یوخ ائله دوز گلمیشم آداملار هامان آداملاردی آنجاق اوچ باشدا بؤزوخلولاردان ایله شیب. آشیق یحیاینان کالبای طوماردا یوخ ایدیلر. بیر قلیان ایسته دیم آلماس قه فه چی قلیانی گتدی. قلیانی چکه چکه اوردا اوتورانلاری سایدیم گوردوم اوتوز باش خان کیشی لی دی اوچ باش بوزوقلی.... دئمه لی اوتوز باش خان کیشی لی اوچ باش بوزوقلی باشا دوشسون دئیه بوزوقلی دیلی دانیشیردیلار. زبوللا کیشی بوزوقلی دیلین بیلمیردی آنجاق اونو دانیشماغا ائله گوج وئریردی کی لاپ آز قالیردی دورغونی پارتلاسین. زبوللا بوزوقلو لارین بیریندن ایسته دی کی مجلیسده شنلیک اولسون دئیه بیر آغیز اوخوسون. اودا باشدادی او توتولموش سسینن بیر بوزوقلو هاواسی اوخودی. زبوللا و اوردا اوتورانلارین چوخو به به دئییب ال چالماقدان دورموردیلار. بوزوقلونون ایفاسی قورتاراندان سورا منده ایلشنلردن ایجازه ایسته دیم کی خانکیشی طایفاسینین ان اؤنملی آدلی سانلی شاعیریندن بیرشعر اوخویام. شعری باشلایاندا گؤزوم بوزوقلولارا ساتاشدی گؤردوم آغیز بورونلارین اییب دوداق آلتی میرتدانیرلار، من شعراوخوماغا دوام ائله دیم آنجاق منی اوچ دورد آدام آلقیشلاییر دیلار و زبوللا دا ایسالا دوشوب سانجیلان آداملارکیمی یئرینده تئز تئز یانین ده ییشدیریردی. آخیردادا شعری یارییا یئتیرمه میشدیم کی منه ایشارت ائله دی کی شعر اوخوماغی دایاندیریب ایله شم یادا بوزوقلی دیلینده اولان شعرلردن اوخویام.

دئدیم: زبوللاایکی ساحاتدی بوزوقلی دیلینده دانیشیب اوخویوبلار، قوی بئش   ده یقه ده خانکیشی دیلی شعری اوخویاق، باخ الن سولدوزنان میصیر بوزوقلی دیلین باشا دوشمه دیکلرینه گورا ایکی ساحاتدی سیزین دوداقلاریزین ترپشمه سین سئیر ائله ییرلر. زبوللا حیرصله نیب منه دئدی کی خانکیشی دیلی باشگوت ماحالیندا یاساقلانیب، بیلمیرسن؟ دئدیم آللاه وئرن دیلی هانسی بنده نین حاققی وار یاساقلاسین؟ بوزوقلولاردا دیله گلیب زبولا نی دستکله ییب دئدیلر شعره دوام ائتسن بیز قه فه دن گئده جه ییک. من دئدیم هئچ کیم سیزی بوردا زورنان ساخلامییب! قارداش بو سؤزو من دئینده زبوللا یوگوردی منیم الیمدن کیتابی آلسین. اوچ دورت آدام خانکیشی لی ده دیللری توتار توتماز دئییردیلر: قارداش بو کیشی ایللر بویو بو قه فه ده شعر اوخویوب نه اولوبکی؟ آنجاق ائله اولاردا آرا قاریشاندان سورا منه دئدیلر : کیتابو گوتو گئت قوی قال ماقال یاتسین. آنجاق منی بیر زاد چوخ یاندیردی، بوزوقلی دیلیندن هئشداد بیلمه ین میصیرده منی دانناقلاییردی. و اونا گورا دا زبوللا جسارتله نیب منه یاخینلاشیب شعر کیتابین الیمدن چکیشدیردی. کیتابی وئرمه یینجه بیر ایکی آدامنان بیرلیکده منی قه فه دن ائشیگه سالدیلار. قاپیدان چیخاندا دالی دونوب باخاندا گؤردوم بوزوقلولار قه فه نین دایاناجاقلارینا سؤیکه نیب منه باخیب  ائله گولورلرکی...


ایندی منی خان کیشی قه فه سینه قویموللار دئییرم گؤره سن بوزوقلو قه فه سینه گئتسم منده اوردا زبوللا کیمی بیر یاریم پالان سوپا تاپا بیللم منی یوخاری باشدا اوتوردا قولتوغومون آلتینا یاسدیق قویا، شعر اوخویام بوزوقلی لار ال چالالار؟

 


آردینی اوخو


بوزوخلو دیلی

یازار : هاماش

+0 به یه ن

 بؤیوک بابام دئیردی بوزوخلولار بیزیم کنده پناه گتیرنده دانیشماق بیلمزدیلر، من اینانمازدیم خخ. منده ده گوناه یوخ ایدی ها بئش اون دنه یئکه کیتاب گؤستریردیلر دئییردیلر گویا او کیتابلاری آتا بابالاری یازیبلار! سورالار بولارین چوخ غریبه ایدداهلارین گؤرندن سورا دئدیم اولمییه بولارین ائله دیللریده باشقا زادلاری کیمی اوردان بوردان بورج آلینیب؟! چوخ سوروش گؤروش آپاراندان سونرا گؤردوم بؤیوک بابام حاقلی ایمیش خخ. بولارین بیزیم دیلی اویرنمه باجاریقلاری اولمادیغینا گورا، بیزیم کاتدالاریمیز بولارا بیر هاساد دیل اویرتمه زوروندا قالیبلار کی هله لیک عمللرین آشیرسینلار آنجاق اونودا اویرنماغا قئیرت گؤسترمه ییب آیرانلی آش کیمی اوردان بیردان قاتیشمیش بیر دیلچگ اؤیره نیبلرخخ.





بئچیخار اولاد

یازار : هاماش

+0 به یه ن
بوندان اول بؤیوک بابامنان تانیش اولدوز. دوزدی مندن خوشو گلمزدی آنجاق آدام گرک اینصافلی اولا کارری باشلی آدام ایدی. بؤیوک بابام دئیردی کی فراساتدی آدامین ندنسه ائولاتلاری چیخارسیز اولار! او بیلردی کیمه سایقی گؤسترسین کیمی خوش دیندیرسین، کیمه سالام وئرسین، کیمی هنده وره قویماسین خولاصه کیمینله یولداش اولسون کیمینله یوخ. ائله اونا گؤرا دا ایسته ینیده چوخ ایدی، ایسته میینیده.  کندیمیزین بیر بوزوقلی طایفاسی وار ائله بو عارییا طایفاسی کیمی اولاردا  یئردن گؤیدن دانیشارلار آنجاق عمله گلنده اللریندن بئش قیرانلیق ایش گلمز، آنجاق نیه آرا قاریشدیرماقدا لاپ اوستادیلار. ایرحمتلیک دئیردی: آدامین بیر کوت دهره سی اولا، بولار دانیشاندا آغیزلارینا آغیزلارینا چیرپا. بولاردا ائله حساب اللرینه گلمیشدی چوخ بیزیم عائیله نین هنده ورینه دولانمازدیلار.  بؤیوک آتام ائلیمیزین بؤیوک هامپالاریندان ایدی، مولکه دارایدی،باغ باغات ،حشم ،مال ،قارا هرزاد دویونجا وار ایدی. ایل بایرامیندا بوتون ائلین اوشاغلارینا یومورتا بویاتدیریب پایلاردی جیبلرین چرشنبه یئمیشیله دولدوراردی. باغ واختی مویوه سیندن خیرمان واختی آرپا بوغدا دوگوسیندن هامینین ائوینه پای گؤندره ردی. بوتون خئیر ایشلرین احسانلارین بانیسی اولاردی. بؤیوک آتام اؤلندن سورا بیر بئله مال وارلیق آتامنان عمیمه قالدی. آتامنان عمیم هم قارداش ایدیلر هم یولداش. بولار هامیلا دوستلوق اولسون دئیه عارییا طایفاسی یوخ باغیشلایین بوزوقلو طایفاسیلا یاخینلاشیب اولارنان یولداشلیق موناسیبتینه گیردیلر. بیلیرسیز دا کوسه نلر باریشاندا بتر قوجاقلاشارلار! او چاغا کیمی هئچ کیم آتامدان عمیمه و یا عمیمدن آتاما بیر سؤز دئیه بیلمزدی آنجاق بوزوقلی لار هم آرا قاریشدیرما اوستاسی ایدیلر همده تزه دوست، و بوندان یارارلاناراق ائله لاپ اول آندان اؤز ایشلرینه باشلامیشدیلار. ائله هردن شوخلوغا سالیب بیر آرا قاریشدیران سؤز آتاردیلار سونرا شوخلوق ائله دیکلرین سویلردیلر آنجاق ائله بو شوخلوخلار ایشین گؤرمگه باشلامیشدی. گئت به گئت آتاملا عمیمین آراسی پوزولماغا باشلامیشدی. آخیردادا بیر گون گؤردوم باغدا آتامنان عمیمین سسی قوزانیب گؤیه. قاچیب آتامی چکیب بیر طرفه سؤیله دیم :آتا جریان نه دی؟ دئدی: باغی بولنده منیم باشیما بؤرک گئچیب! دئدیم او واخت دئییردین ایکیسیده بیردی، ایندی نه اولدی به؟ منه بیر گؤز آغارتماسی گلدی سسیمی کسدیم. اوگوندن بئله هئچ زاد سؤزه ال اله قالخدیلار. هر بیر داوادان سورادا بؤزوقلی طایفاسیندان اولان دوستلارینان درتله شیردیلر! ائله اولدی کی آتام آتاسیندان قالان حیه طدن پایین بؤزوقلی طایفاسینا ساتدی، نیه کی ایسته میردی زهلم گئتمیش قارداشینین اؤزون گؤرسون. عمیده اونون آجیغینا باغدان اولان پایین ساتدی بوزوقلی طایفاسینا.  هن ... ایندی بیر یول بوزوخلی لار گرچک اوزلرین گؤسترمگه باشلادیلار. چوخ زامان گئچمه دی کی گؤردوم آتام ائله نایراحتدی لاپ آز قالیر سهته ائله سین. دئدیم نه اولوب؟ دئدی : عمیوین باغین آلان بوزوقلو کؤپگ اوغلو گونده باغین مرسین قاریشدیریر. بوگون سؤزوموز چیخیب ساواشمیشیق،دئییر باغین بوتونو بیزیمدی! دئیرم سنه هاردان گلیب؟ دئییر اوواخت آتان آتامی زورلاییب. بویاندان سحر خبر گلدی کی عمیم قونشوسیلا بوغوشوب. آتام منی گؤندردی گئدیم گؤروم نه خبر؟ عمیم منی گورنده دئدی:آی گوروم او مردم آزار آتاوین بئلی سینسین، منی ائله آدامنان قونشو ائله دی کی هله چکمه لی یم. اونوندا ائوینین دیواری اوچولمیشدی،گویا بوزوقلی دوستو دیوارین لاپ دیبیندن قویو قازیرمیش. اودا ائوه قابالا چیخادیردی .
دئدیم عمی ایرحمتلیک بؤیوک آتام بیرزاد بیلیرمیش ها بو جاناوارلاری هنده وره قویمورموش!!
باشین سالیب آشاغی هئچ سؤز دئمه دی.




پانتورک ده ده م

یازار : هاماش

+0 به یه ن

 آللاه اؤلنلریزی باغیشلاسین،منیم  ده ده م(بؤیوک آتام) لاپ خالیص پاتنورک ایدی، بیر یول گؤرمه دیم کیشی نین آغزیندان بیر"آذری" سؤزی چیخسین. ائله بئش سؤزون باشیندا بیر "تورک سؤزو" یا تورکون مثلی عیبارتی ایشله دردی. دانیشاندا ائله سؤزلر ایشله در دی کی ایندی کی نسیل اونلارین اوندا بیرین باشا دوشمزلر یانی گرگ فارسجایا چئویره سن تا بو یازیق بئساواتلار باشا دوشه لر. میثال ایچون زیر سیگاریه کول قابی دئیردی صوبحانه یه قلیان آلتی نه بیلیم بوخارییه پئنج و ها بئله داا. ایندی گورورم کی کیشی لاپ ائله بو زامانه نین پانتورک لرینه تای ایمیش! ایرحمتلیک اولمه سه یدی ایندی گونو زیندانلاردا گئچیردی!

من او فارس شهرلرینین بیرینده درس اوخویاندا فارس دوستلاریمین بیرین کندیمیزه قوناق آپارمیشدیم. اوتاغدا بوننان دانیشاندا گوردوم ده ده م دورت قولاقلی قولاق آسیر. بیر آز سونرا گوردوم آتامی چاغیریب قولاغینا پیچیلداییر. سورا آتامدان سؤروشدوم ده ده م نه دئییردی؟ دئدی: سن او فارس دوستونان دانیشاندا دده ن قولاق آسیب ایندی دئییر سنین او دوستون ائله بیل ارمنی دی،دئییر اونو یولا سال گئتسین بو اوشاغی دیندن چیخاردار،یاواش یاواش بودا چال په شیک دانیشماغا باشلاییب. منده حیرصله نیب گئتدیم ده ده مه گیلئیلندیم کی سن نیه منیم دوستوما بوهتان دئییبسن؟ کیشی چه لیگین گوتوروب منی قوغالادی کی; قودوغ آخی ارمنی دن ده دوست اولار؟ ها دئدیم کیشی بو ارمنی دئییل اینانان کیم ایدی؟ آخی بیلیرسیز اوندا دا گوناه یوخ ایدی هاا او ارمنی لرین ظولومین گؤزینن گؤرمیشدی. ارمنی نی نجیس بیلردی. دئیردی بولار دوغوزداندا مینداردیلار. منیم او فارس یولداشیم گئدندن سونرا آتاما حوحمان ائله دئییردی گرگ ائوین دامین گؤتوره سن ائوه گون ده یه. آتامدا دئییردی:کیشی آخی من نه تهر بو بویدا ائوین دامین اوچوردوم سونرا دوزه لدیم؟ آخیردادا او کیشی نی ایراضی ائله مگ ایچون قوناق اوتاقینین اوستون گؤتیریب یئنی دن دؤزه لتدی. دوزون آختارساز او ویله دن بو یانا منیده چوخ خوش دیندیرمه ییردی. ائله هئی ملا مسییبه گئدیب منه دووا یازدیراردی گتیریب قارننه مه وئره ردی، اودا  سویا سالیب وئره ردی من ایچه م یا گوره ردین بیر پارچانین آراسینا قویوب اوچ بوجاق تیکردی سانجاقلاردی کؤینگیمه. ده ده م هردن ائله منه باخیب دئیردی: ارمنینن دوست اولاندان  اوشاق آداملیقدان چیخدی.

بیر گون جانا گلیب دئدیم: کیشی خاتاقان اولدی بیر فارس یولداشیم اولدی؟ فارس هارا ارمنی هارا؟ کیشی ائله ایکی آیاقین بیر باشماغا گئیمیشدی کی سن اوجور زاتلاری بیلمزسن. او ارمنی ایدی.

آللاه اونا ایرحمت ائله سین او اؤلوب گئدیب من فیکیره دوشمیشم کی گؤره سن او حاقلی ایمیش یا من؟





قهبه شوونی

یازار : هاماش

+0 به یه ن

گئچن ایللرده بیزیم محله یه بیر قادین کوچمیشدی. ائو اشیا لرین گتیرنده یانیندا بیر کیشی وار ایدی. ائو صاحیبینه اونون اری اولدوغون سؤیله میشدی. اؤزوده هئچ آداما اوخشامیردی آنجاق ایمکاناتین چوخلوغو اونا بو فیرصتی یاراتمیشدی کی بزه دن تزه دن اؤزونه گوزونه باشینا یاخیب اؤزون بیر آز آداما اوخشاتسین. یئرین برکیدندن سورا یانینداکی کیشینی گوندردی ماموریته آنجاق هئچ کیشی سیزلیکدن ضیق چکمه دی. ائله هر گون ایکی اوچ جینسی مذکر اونون خاراب قالمیشینا گیردی چیخدی. یاواش یاواش قونشولارین سسی چیخدی ائله هر کیم سؤروشدو;بو کیمدی؟ بیرین قارداشی،بیرین داییسی،عمیسی و ها بئله سایدی.

ایش بئله اولونجا محلله نین ایکی آغ ساققالی وار،اونلاری گؤندردیلر کی بو جیندایلا دانیشسینلار یا اؤزون ایصلاح ائله سین یاداکی اوردان کوچسون. بیر گون سونرا کابلای بایرامی(آغ ساققاللارین بیری) چورک خانایا گئدنده گوردوم. سوروشدوم نه خبر؟ دئدی قارداش منی بو ایشه قاتمیین! دئدیم: نیه؟ دئدی: بو سفر او منی ایناندیردی کی قهبه دئییل. بیر سفرده گئتسم ایناندیراجاق کی گویا او یوخ، من قهبه یم!!

دئییرم بو ماجرا لاپ ائله بعضی فارس یازیچی لارین ایشینه بنزه دی. هر ایشه ال ویریرلارکی بیزه قبول ائتدیره لرکی بیز تورک دئییلیک. گؤرورسن بیر ننه سینین اوغلی کی هئچ اؤز آتاسین تانیماییر ژنتیک دئنه مه سیله کشف ائله ییرکی ایرانداکی و حتا قونشو اولکه لرده کی تورک لر ائله همان فارسلاردیلار آنجاق ایندی تورکی دانیشیرلار!! حتا بعضی کابلای بایراملاردا بو قهبه شوونی سونوجوندا اؤزلریندن شوبهه ائله ییرلر!

بونلارا دئین یوخدی قهبه لیگی سیز ائله دیز بیز بیج اولدوق؟؟!