مکتبین بیرینجی گونو

یازار : هاماش

+0 به یه ن
اینقلاب اولاندان بیر ایکی ایل سونرا بیرینجی کیلاسدا درس اوخوماغا باشلامیشدیق. تورک اوشاقی اولدوغوموزا گورا فارسی دانیشماق بیلمیردیک. سئوینیردیک کی درس اوخویروق آللاه قویسا آدام اولاق. سحر سحر بیزی دوزدولر سیرایا نابلد بیر دیلده بیر سؤزلر دئدیلر دووادان سوروددان اوخودولار بیزده ائله هردن یالاندان آغزیمیزی آچیب یوموردیق قوی دئسینلر بیزده بیرزادلار بیلیریک. هر حالدا بیزی گؤندردیلر کلاسلاردا هره نی اؤز یئرینده اوتورتدیلار. بیر آز سونرا کلاسین قاپیسی آچیلدی،بیر قره بوغلی بوی بوخونلی  چوخ یاراشیقلی بیر معلیم وارید اولدو کیلاسا بیزه باخیب گوله گوله دئدی :اوشاقلار سالام. بیزده هئچ چوخوموز سالام وئرمه نیده باجارمیردیق،کمک لشدیق اونون جاوابین وئردیک. بیر آز کئف احوالدان سونرا معلیم باشلادی بیزدن بیر بیر آدیمیزی سوروشماغا. هن اوغول سنین آدین ندی؟ منده دئدیم جاببار. شهرتین ندی؟ باخدیم معلیم اؤزونه. من نه بیلیم آخی شهرت یانی نه. دئدیم ددیمن آدین سوروشسان عیسا دی. سوروشا سوروشا گئتدی. بعضی لریده هله اوتاندیغیندان باشین سالیب آشاغی کؤینه گینین حوققیلین چینه ییردی. دالیدا بیر اروج آدیندا بیرینه نوبا یئتیشدی. معلیم اوندان سوروشدی :اوغول آدین ندی ؟ الیوا دونیم اروج بیردن باشلادی:آغا اسمم اوروج هست اسم پدرم جمشید. هامینین آغزی آچیلا قالدی بیز دئدیک ایندی معلیم اونا بیر جایزه دن زاددان وئره جک بیزیم الیمیز بوشدا قالاجاق. معلیم بیر گولدی اروجا دئدی: اوروج فارسی نی سنه کیم اویردیب؟ اروج گئنه اوجا سسله فارسجا سؤیله دی: بابام یاد داده. معلیم دئدی : اروج تورکونی ده باشارارسان؟ اروج قاییتدی دئدی:آغا بیر آز بلدم اما پدرم دئییب فارسی مهمتره. معلیم چوخ سویوق قانلی دئدی:اوروج دده ن غلط ائله ییب تورکو فارسی دان موهومدی اول اونو اویرن سورا.
دئییرم اوندا بیز آنلاسایدیق  عزیز اویرتمن نه دئییر ایندی بلکه گونوموز بو ده ییردی!